Sunday, June 4, 2023

Mohammed Siraj: సిరాజ్ కొత్త ఇంట్లో ఆర్సీబీ ఆటగాళ్లకు ఆతిథ్యం.. ఆ ఫొటో ఫ్రేమ్‌పైనే అందరి దృష్టి

ఐపీఎల్‌లో ఆర్సీబీ తరఫున అదరగొట్టి.. టీమిండియాలో కీలక బౌలర్‌గా ఎదిగిన హైదరాబాదీ పేసర్ మహ్మద్ సిరాజ్ (Mohammed Siraj) జూబ్లీహిల్స్‌లోని ఫిల్మ్ నగర్‌లో కొత్త ఇల్లు కట్టుకున్న సంగతి తెలిసిందే. గురువారం ఉప్పల్ స్టేడియంలో సన్‌రైజర్స్‌‌తో ఆర్సీబీ తలపడనుండటంతో ఆ జట్టు ఆ జట్టు ఆటగాళ్లు ఇప్పటికే హైదరాబాద్ చేరుకున్నారు. దీంతో కోహ్లితోపాటు ఇతర ఆర్సీబీ ఆటగాళ్లను డిన్నర్ కోసం తన కొత్తింటికి ఆహ్వానించిన సిరాజ్.. వారికి అతిథి మర్యాదలు చేశాడు. కోహ్లి, డుప్లెసిస్‌తోపాటు కేదార్ జాదవ్, వ్యాన్ పార్నెల్, అనుజ్ రావత్, మహిపాల్ లామ్రోర్, మిచెల్ బ్రాస్‌వెల్, కోచ్‌లు మైక్ హసన్, సంజయ్ బంగర్ తదితరులు సిరాజ్ ఇంటికి వచ్చి సందడి చేశారు.

ఆర్సీబీ ఆటగాళ్లు సిరాజ్ ఇంటికి వచ్చిన ఫొటోలను రాయల్ ఛాలెంజర్స్ బెంగళూరు ఫ్రాంచైజీ సోషల్ మీడియాలో పోస్టు చేసింది. ఈ ఫొటోలన్నింటిలో ఒక ఫొటో మాత్రం అభిమానులను విపరీతంగా ఆకట్టుకుంది. బ్రాస్‌వెల్, హేజిల్‌వుడ్ సోఫాలో కూర్చొని మాట్లాడుకుంటుండగా కెమెరామ్యాన్ క్లిక్‌మనిపించిన ఫొటో ఇది. అయితే నెటిజన్లను ఆ ఫొటో ఆకర్షించడానికి కారణం సిరాజ్ ఇంట్లో గోడకు వేలాడదీసిన ఫొటో ఫ్రేమ్. టీమిండియా తరఫున ఆడే సమయంలో వికెట్ తీశాక సిరాజ్ కోహ్లికి హత్తుకుంటున్న ఫొటోను సిరాజ్ ఫ్రేమ్ కట్టించుకున్నాడు.
ఈ ఫొటో ఫ్రేమ్‌ను చూశాక ఆర్సీబీ ఫ్యాన్స్ కోహ్లితో సిరాజ్‌కున్న బాండింగ్‌ను ప్రశంసిస్తున్నారు. కోహ్లి కెప్టెన్సీలో ఆర్సీబీ తరఫున ఎన్నో మ్యాచ్‌లు ఆడిన సిరాజ్.. అతడి సారథ్యంలోనే టీమిండియా తరఫున 2017లో న్యూజిలాండ్‌తో మ్యాచ్‌లో టీ20ల్లోకి ఎంట్రీ ఇచ్చాడు.
కోహ్లితోపాటు ఆర్సీబీ ఆటగాళ్లు సిరాజ్ ఇంటికి వెళ్లడం ఇదే తొలిసారి కాదు. 2018లోనూ సన్‌రైజర్స్‌తో మ్యాచ్ ఆడటం కోసం ఆర్సీబీ హైదరాబాద్ వచ్చిన సమయంలో కోహ్లి, చాహల్, మన్‌దీప్ సింగ్ తదితరులు టోలీచౌకీలోని సిరాజ్ ఇంటికి వెళ్లారు. అప్పుడు కూడా బిర్యానీతోపాటు రకరకాల వెరైటీలను సిరాజ్ ఆర్సీబీ ప్లేయర్లకు స్వయంగా వడ్డించాడు.

2020-21లో భారత జట్టు ఆస్ట్రేలియా గడ్డ మీద బోర్డర్ గావస్కర్ ట్రోఫీ గెలిచిన సంగతి తెలిసిందే. ఆ జట్టులో సభ్యుడైన సిరాజ్.. భారత ఆటగాళ్లు సంబరాలు చేసుకుంటున్న ఫొటోను మరో ఫ్రేమ్ కట్టించాడు. ఆ ఏడాది టీమిండియా బోర్డర్ గావస్కర్ ట్రోఫీ గెలవడంలో సిరాజ్ కీలక పాత్ర పోషించాడు. ఆ సిరీస్ ద్వారా టెస్టుల్లోకి అడుగుపెట్టిన సిరాజ్ 13 వికెట్లు తీశాడు. గబ్బాలో గత మూడు దశాబ్దాల్లో టెస్టు మ్యాచ్ గెలిచిన పర్యాటక జట్టుగా టీమిండియా చరిత్ర సృష్టించింది.

Latest news
Related news