rajesh gopinathan, TCS: టీసీఎస్‌లో ఊహించని పరిణామం.. CEO గోపినాథన్ రాజీనామా.. కారణమేంటి? – tcs ceo rajesh gopinathan steps down as tcs md and ceo

TCS: దేశీయ అతిపెద్ద సాఫ్ట్‌వేర్ సర్వీస్ ప్రొవైడర్ సంస్థ టాటా కన్సల్టెన్సీ సర్వీసెస్‌లో (Tata Consultancy Services) ఊహించని పరిణామం చోటు చేసుకుంది. కీలక ఉద్యోగి సంస్థకు గుడ్‌బై చెప్పారు. టీసీఎస్ ఎండీ అండ్ సీఈఓ (TCS CEO) రాజేశ్ గోపీనాథన్ రాజీనామా చేస్తున్నట్లు గురువారం సాయంత్రం ప్రకటించారు. ఆయన రాజీనామాకు గల కారణాలు బయటకు తెలియరాలేదు. ఇన్ఫోసిస్ అధ్యక్షుడు మోహిత్ జోషి ఇటీవలే రాజీనామా చేసి టెక్ మహీంద్రా మేనేజింగ్ డైరెక్టర్‌గా నియామకమైన నాలుగు రోజుల్లోనే టీసీఎస్ సీఈఓ అండ్ ఎండీ రాజీనామా చేయడం ప్రాధాన్యం సంతరించుకుంది.

‘టాటా కన్సల్టెన్సీ సర్వీసెస్ లిమిటెడ్ చీఫ్ ఎగ్జిక్యూటివ్ ఆఫీసర్ అండ్ మేనేజింగ్ జైరెక్టర్ రాజేశ్ గోపీనాథన్ (Rajesh Gopinathan) తన పదవికి రాజీనామా చేశారని మేము ప్రకటిస్తున్నాం. ఆయన సెప్టెంబర్ 15, 2023 వరకు మాత్రమే సంస్థతో కలిసి పని చేస్తారు.’ అని ఎక్సేంజీ ఫైలింగ్‌లో తెలిపింది టీసీఎస్. ఆయన స్థానంలో కే.క్రితివాన్‌ను (Krithivasan) చీఫ్ ఎగ్జిక్యూటివ్ ఆఫీసర్‌గా నియమించుకున్నట్లు తెలిపింది. ఆయన మార్చి 16, 2023 నుంచి విధుల్లోకి వస్తారని వెల్లడించింది.

అత్యధిక శాలరీ తీసుకున్న సీఈఓల్లో ఒకరు..
టీసీఎస్ సీఈఓ అండ్ ఎండీగా రాజేశ్ గోపీనాథన్ ప్రపంచంలోనే అత్యధిక శాలరీ అందుకున్న ఉన్నత స్థాయి అధికారుల్లో ఉన్నారు. 2021-22 ఆర్థిక ఏడాదిలో ఆయన పరిహారం 26.6 శాతం పెరిగి రూ.25.75 కోట్లకు చేరింది. అందులో జీతం రూ.1.5 కోట్లుగా ఉండగా.. ఇతర బెనిఫిట్స్ అలవెన్సెస్ రూ.2.25 కోట్లుగా ఉన్నాయి. మొత్తం కమీషన్ రూ.22 కోట్లుగా ఉంది. టీసీఎస్ రెమ్యూనరేషన్‌ను శాలరీ, బెనిఫిట్స్, అలవెన్సెస్, కమిషన్ (వేరియేబుల్ కాంపోనెంట్) వంటి వాటితో మేనేజింగ్ డైరెక్టర్లు, ఎగ్జిక్యూటివ్ డైరెక్టర్లకు శాలరీలు అందిస్తుంది. రాజేశ్ గోపినాథ్ టీసీఎస్ ఫార్చూన్ 500 కంపెనీల్లో ఒకటిగా నిలపడంలో ప్రధాన పాత్ర పోషించారని చెబుతారు. ఆయన తిరుచీలోని ఎన్ఐటీ నుంచి ఎలక్ట్రికల్ అండ్ ఎలక్ట్రానిక్స్ ఇంజినీరింగ్ డిగ్రీ పొందారు. ఐఐఎం అహ్మదాబాద్ నుంచి పోస్ట్‌గ్రాడ్యూయెట్ డిప్లమా ఇన్ మేనేజ్‌మెంట్ చేశారు.

ఆయనను మరో ఐదేళ్లు టాప్ ఎగ్జిక్యూటివ్‌గా పొడిగిస్తూ మార్చి 2022లో సంస్థ నిర్ణయం తీసుకుంది. అంటే ఫిబ్రవరి 21, 2022 నుంటి ఫిబ్రవరి 20, 2027 వరకు ఆయన ఉన్నత పదవిలో కొనసాగే వీలుంది. అయితే, ఇలా ఊహించని విధంగా ఆయన రాజీనామా చేయడం గమనార్హం. అందుకు గల కారణాలు ఇంకా తెలియరాలేదు.

• Read Latest Business News and Telugu News