jeet adani engaged, Adani: అదానీ ఇంట పెళ్లి సందడి.. చిన్న కుమారుడు జీత్ అదానీ నిశ్చితార్థం.. అమ్మాయి ఎవరంటే? - gautam adani younger son jeet gets engaged to diva jaimin shah in ahmedabad

Adani: ప్రముఖ పారిశ్రామికవేత్త, అదానీ గ్రూప్ ఛైర్మన్ గౌతమ్ అదానీ ఇంట పెళ్లి సందడి మొదలైంది. త్వరలోనే పెళ్లి బాజాలు మోగనున్నాయి. ఆయన చిన్న కుమారుడు జీత్ అదానీకి అతికొద్ది మంది బంధువుల మధ్య మార్చి 12న అహ్మదాబాద్‌లో నిశ్చితార్థం జరిగింది. దివా జైమిన్ షా అనే అమ్మాయితో జీత్ అదానీకి (Jeet Adani Engaged) నిశ్చితార్థం జరిగింది. కుటుంబ సభ్యులు, కొద్ది మంది బంధువుల సమక్షంలో ఈ వేడుక అత్యంత నిరాడంబరంగా జరిగినట్లు తెలుస్తోంది. ప్రస్తుతం జీత్ అదానీ నిశ్చితార్థానికి సంబంధించిన ఓ ఫోటో సామాజిక మాధ్యమాల్లో వైరల్‌గా మారింది. అయితే, ఆయన పెళ్లి ఎప్పుడనే వివరాలు బయటకు తెలియరాలేదు.

పెళ్లి కూతురు ఎవరంటే?
గౌతమ్ అదానీ (Gautam Adani) చిన్న కుమారుడు జీత్ అదానీతో దివా జైమిన్ షాతో (Diva Jaimin Shah) నిశ్చితార్థం జరిగింది. ఆమె గుజరాత్‌కు చెందిన ప్రముఖ వజ్రాల వ్యాపారి జైమిన్ షా కుమార్తె. ఆయనకు సీ దినేశ్ అండ్ కో ప్రైవేట్ లిమిటెడ్ అనే డైమండ్ కంపెనీ ఉంది. అది ముంబైయి, సూరత్ వెలుపల కార్యకలాపాలు నిర్వహిస్తోంది. వీరి వివాహం ఎప్పుడు అనే విషయం బయటకు రాకపోయినా 2024 చివరి నాటికి పెళ్లి పీటలు ఎక్కబోతున్నారనే వార్త చక్కర్లు కొడుతోంది.

జీత్ అదానీ..
గౌతమ్ అదానీ చిన్న కుమారుడు జీత్ అదానీ యూనివర్సిటీ ఆఫ్ పెన్సిల్వేనియా నుంచి ఇంజినీరింగ్ అండ్ అప్లైడ్ సైన్సెస్‌లో డిగ్రీ పట్టా పొందారు. 2019లో అదానీ గ్రూప్‌లో సీఎఫ్ఓగా చేరారు. ప్రస్తుతం ఆయన అదానీ గ్రూప్ సంస్థల ఉపాధ్యాక్షుడిగా బాధ్యతలు నిర్వర్తిస్తున్నారు. అదానీ ఎయిర్ పోర్ట్ వ్యాపారంతో పాటు, అదానీ డిజిటల్ ల్యాబ్స్, స్ట్రాటజిక్ ఫైనాన్స్, క్యాపిటల్ మార్కెట్, గవర్నమెంట్ పాలసీ వంటి బాధ్యతలను చూస్తున్నారు జీత్ అదానీ. వినియోగదారుల అవసరాలకు అనుగుణంగా అదాన గ్రూప్ త్వరలోనే తీసుకురాబోతున్న యాప్‌ను డిజిటల్ ల్యాబ్స్ అభివృద్ధి చేస్తోంది. కుటుంబ వ్యాపారంలో కీలక పాత్రలు పోషించడంతో పాటు జీత్ అదానీ మంచి పైలట్ కూడా. ప్రపంచ పైలట్ల దినోత్సవం రోజున ఓ ఛార్టర్డ్ ఫ్లైట్ నడుపుతున్న ఫోటోను ట్విట్టర్ లో షేర్ చేశారు జీత్ అదానీ. అదానీ పెద్ద కుమారుడు కరణ్ అదానీ.. అదానీ పోర్ట్స్ అండ్ సెజ్ లిమిటెడ్ సీఈఓగా వ్యవహరిస్తున్నారు.

అదానీ గ్రూప్ కంపెనీలపై అమెరికాకు చెందిన షార్ట్ సెల్లర్ హిండెన్ బర్గ్ నివేదిక తీవ్ర ఆరోపణలు చేసిన సంగతి తెలిసిందే. జనవరి 24న ఈ నివేదిక వెలువడగా.. అప్పటి నుంచి అదానీ గ్రూప్ కంపెనీలు తీవ్రంగా నష్టపోయాయి. మార్కెట్ క్యాపిటలైజేషన్ తగ్గిపోయింది. దీంతో గౌతమ్ అదానీ వ్యక్తిగత సంపద సైతం భారీగా పడిపోయింది. ఈ క్రమంలో ప్రపంచ కుబేరుల జాబితాలో 3 వ స్థానం నుంచి 30వ స్థానానికి పడిపోయారు గౌతమ్ అదానీ. ఇలాంటి పరిస్థితుల్లో అదానీ ఇంట్లో పెళ్లి బాజాలు మోగుతుండడం గమనార్హం.