Sunday, April 2, 2023

WTC Final కోసం రోహిత్ శర్మ ‘మే 21’ ప్లాన్.. ట్రోలింగ్ కొని తెచ్చుకున్న కెప్టెన్..!

బోర్డర్ గావస్కర్ ట్రోఫీ ముగిసింది. 2-1 తేడాతో ఆస్ట్రేలియాను ఓడించిన టీమిండియా సిరీస్ గెలవడంతోపాటు వరల్డ్ టెస్ట్ ఛాంపియన్‌షిప్ ఫైనల్‌కు అర్హత సాధించింది. జూన్ ఏడో తేదీన లండన్ వేదికగా భారత్, ఆస్ట్రేలియా మధ్య బోర్డర్ గావస్కర్ ట్రోఫీ జరగనుంది. ఈలోపే ఇరు జట్ల మధ్య వన్డే సిరీస్‌తోపాటు.. ఐపీఎల్ జరగనుంది. ఐపీఎల్ ఫైనల్ ముగిసిన 9 రోజులకే భారత ఆటగాళ్లు డబ్ల్యూటీసీ ఫైనల్లో ఆసీస్‌తో తలపడాల్సి ఉందన్నమాట.

వేర్వేరు ఫ్రాంచైజీల తరఫున ఆడుతున్న ఆటగాళ్లంతా కలిసి ఓ చోట చేరి లండన్ బయల్దేరి వెళ్లడం.. పూర్తిగా విభిన్నమైన ఫార్మాట్లో బలమైన ఆస్ట్రేలియా జట్టును ఓడించడం అంత తేలికేం కాదు. టీమిండియా హెడ్ కోచ్ రాహుల్ ద్రావిడ్ సైతం ఇదే తరహా అభిప్రాయం వ్యక్తం చేశాడు. కానీ డబ్ల్యూటీసీ ఫైనల్ కోసం ఆటగాళ్ల సన్నద్ధతను పెంచడం కోసం కెప్టెన్ రోహిత్ శర్మ ఓ ప్లాన్ చెప్పాడు.

ఐపీఎల్‌లో పది ఫ్రాంచైజీలు ఆడుతున్న సంగతి తెలిసిందే. మే 21 నాటికి ఆరు జట్లు ప్లే ఆఫ్ రేసు నుంచి నిష్క్రమిస్తాయి. ప్లే ఆఫ్ చేరలేని జట్లకు ఆటగాళ్లను త్వరగా లండన్ విమానం ఎక్కించి అక్కడి పరిస్థితులకు త్వరగా అలవాటు పడేలా చూస్తామని.. అక్కడ వాళ్లు వీలైనంత ఎక్కువగా ప్రాక్టీస్ చేసేలా చూస్తామని అహ్మదాబాద్ టెస్టు ముగిసిన అనంతరం రోహిత్ శర్మ వ్యాఖ్యానించాడు.

రోహిత్ చెప్పిన ఐడియా వినడానికి బాగానే ఉంది కానీ ప్రాక్టీకల్‌గా చూస్తే పెద్దగా ఉపయోగం ఉండకపోవచ్చు. ముంబై జట్టులో రోహిత్, బుమ్రా.. ఆర్సీబీలో కోహ్లి, సిరాజ్.. చెన్నైలో జడేజా, రాజస్థాన్‌ రాయల్స్‌లో అశ్విన్, గుజరాత్ టైటాన్స్‌లో శుభ్‌మన్ గిల్, లక్నోలో కేఎల్ రాహుల్.. ఇలా కీలక ఆటగాళ్లంతా వేర్వేరు ఫ్రాంచైజీలకు ఆడుతున్నారు.

ఐపీఎల్ గెలవడం ముఖ్యమే కావచ్చు. కానీ ఐసీసీ ట్రోఫీ గెలవడం ఎంతో ప్రతిష్టాత్మకం. కాబట్టి ‘టీమిండియా’కు తొలి ప్రాధాన్యం ఇచ్చి డబ్ల్యూటీసీకి ఎంపిక చేసిన ఆటగాళ్లంతా ఐపీఎల్‌ను పక్కనబెట్టి కాస్త ముందుగానే లండన్ ఫ్లైట్ ఎక్కడం బెటరని క్రికెట్ ప్రేమికులు సూచిస్తున్నారు.

కొందరైతే రోహిత్ వ్యాఖ్యలను సరదాగా తీసుకొని.. ముంబై ఇండియన్స్, ఆర్సీబీ, చెన్నై, రాజస్థాన్, గుజరాత్ లాంటి జట్లు ముందుగానే ఐపీఎల్ నుంచి ఎలిమినేట్ కావాలని.. అప్పుడు టీమిండియా టెస్టు జట్టులో సభ్యులుగా లేని ఫ్రాంచైజీలు ప్లే ఆఫ్ చేరితే సరిపోతుందని సరదాగా వ్యాఖ్యానిస్తున్నారు. ఏదేమైనా అటు ఐపీఎల్.. ఇటు డబ్ల్యూటీసీ ఫైనల్.. బీసీసీఐ ముందు పెద్ద సవాలే ఉంది. దీన్ని ఎలా డీల్ చేస్తారో మరి. ఫస్ట్ టైం ఫైనల్లో ఓడినా లక్కీగా రెండోసారి ఫైనల్లో తలపడే అవకాశాన్ని బీసీసీఐ రెండు చేతులా ఒడిసి పట్టుకోవాల్సిందే. పొరబాటున డబ్ల్యూటీసీ ఫైనల్లో భారత్ ఓడితే మాత్రం.. ట్రోలింగ్ ఏ రేంజ్‌లో ఉంటుందో చెప్పాల్సిన అవసరం లేదు కదా.

Latest news
Related news