Thursday, March 30, 2023

Sharwanand: ప్రతిక్షణం పరుగులు తీస్తూనే ఉంటాను.. శర్వానంద్ భావోద్వేగ సందేశం

యంగ్ హీరో శర్వానంద్ (Sharwanand) సినీ పరిశ్రమలో 20 ఏళ్లు పూర్తిచేసుకున్నారు. ఈ సందర్భంగా ప్రేక్షకులకు కృతజ్ఞతలు తెలుపుతూ ఒక భావోద్వేగ సందేశాన్ని విడుదల చేశారు శర్వానంద్. ఈరోజు శర్వానంద్ పుట్టినరోజు. ఇదే రోజు ఆయన 20 ఏళ్ల సినీ జీవితాన్ని ముగించుకోవడం విశేషం. ‘అద్భుతమైన ప్రపంచంగా పిలచుకునే సినిమాలో 20 ఏళ్ల అద్భుతమైన ప్రయాణం పూర్తి చేశాను. నా ఈ ప్రయాణంలో ఎదురైన ప్రతి క్షణాన్ని, అందిన దీవెనలను ఆస్వాదించాను’ అని పేర్కొంటూ ఒక సందేశాన్ని శర్వానంద్ ట్వీట్ చేశారు.

‘20 ఏళ్లుగా ఎన్నో పాత్రలు చేస్తూ, వెండితెరపై అందర్నీ అలరిస్తున్నాను. భావోద్వేగాలతో నిండిన ఈ ప్రయాణంలో 20 సంవత్సరాల స్నేహం, కష్టాలు, ఎత్తులు, లోతులు, చిరునవ్వులు ఎన్నో మరెన్నో. అచంచలమైన ప్రేమ, మద్దతుతో నా ఈ ప్రయాణంలో నాకు అండగా నిలిచిన మీ అందరికీ ధన్యవాదాలు. ఈ 20 సంవత్సరాలు నా జీవితాన్ని, నా వ్యక్తిత్వాన్ని అద్భుతంగా మలిచాయి. నా ఈ ‘ఒకే ఒక జీవితం’ సినిమాకి అంకితం. 20 సంవత్సరాల క్రితం ‘శ్రీకారం’ చుట్టిన ఈ సినీ ‘ప్రస్థానం’ మరుపురానిది, మరువలేనిది. ఈ సినీ లోకంలో నా ‘గమ్యం’ ఎంతో దూరం. మిమ్మల్ని అలరించడం కోసం ప్రతి క్షణం ‘రన్‌ రాజా రన్‌’లా పరుగులు తీస్తూనే ఉంటాను. కృషి చేస్తూనే ఉంటాను. ‘శతమానం భవతి’ అంటూ మీరు నాకు ఇచ్చే ఆశీస్సులతో ఇది సాధ్యమవుతుందని నేను నమ్ముతున్నాను’ అని తన సందేశంలో శర్వానంద్ పేర్కొన్నారు.

మెగాస్టార్ చిరంజీవి కుటుంబానికి సన్నిహితంగా ఉండే శర్వానంద్.. మొదట స్క్రీన్ మీద కనిపించింది కూడా చిరుతోనే. 2003లో చిరంజీవి చేసిన థమ్స్ అప్ యాడ్‌లో శర్వానంద్ నటించారు. అదే ఏడాది ‘ఐదో తారీఖు’ అనే సినిమాతో వెండితెర ప్రవేశం చేశారు. అయితే, 2008లో ‘గమ్యం’ సినిమా వచ్చేంత వరకు శర్వానంద్ చిన్న చిన్న పాత్రలే చేశారు. ‘గమ్యం’ సినిమాలో అల్లరి నరేష్‌తో కలిసి శర్వానంద్ నటించారు. ఈ సినిమా ఎంత పెద్ద విజయం సాధించిందో అందరికీ తెలిసిందే.

ఆ తరవాత 2010లో ‘ప్రస్థానం’ సినిమా శర్వానంద్‌కు మరో హిట్ ఇచ్చింది. అయితే, 2014లో వచ్చిన ‘రన్ రాజా రన్’ సినిమా నుంచే శర్వా జోరు మొదలైంది. ఈ సినిమా శర్వానంద్‌కు కమర్షియల్ హీరోగా గుర్తింపు తెచ్చిపెట్టింది. ఇక అక్కడి నుంచి శర్వానంద్ వెనుదిరిగి చూసుకోలేదు. ‘మళ్లీ మళ్లీ ఇది రాని రోజు’ సినిమాకు నంది అవార్డు గెలుచుకున్నారు. ‘శతమానం భవతి’ సినిమాతో ఏకంగా జాతీయ చలనచిత్ర పురస్కారాన్ని దక్కించుకున్నారు. అయితే, ‘శతమానం భవతి’ తరవాత మళ్లీ ఆ స్థాయి విజయాన్ని తన ఖాతాలో వేసుకోలేకపోయారు శర్వానంద్.

‘మహానుభావుడు’ సినిమా ఫర్వాలేదనిపించినా.. ‘పడిపడి లేచె మనసు’, ‘రణరంగం’, ‘జాను’, ‘శ్రీకారం’, ‘మహాసముద్రం’, ‘ఆడవాళ్ళు మీకు జోహార్లు’, ‘ఒకే ఒక జీవితం’ సినిమాలు బాక్సాఫీసు వద్ద బోల్తా పడ్డాయి. ప్రస్తుతం శర్వానంద్ 35వ సినిమా షూటింగ్ జరుగుతోంది. త్వరలోనే ఈ సినిమాకు సంబంధించిన మరిన్ని వివరాలను వెల్లడికానున్నాయి.

Latest news
Related news