‘అమిగోస్’ డిజిటల్ స్ట్రీమింగ్ హక్కులను నెట్‌ఫ్లిక్స్ ఇండియా కొనుగోలు చేసింది. తాజాగా ‘అమిగోస్’ ప్రీమియర్స్ తేదీని నెట్‌ఫ్లిక్స్ ఇండియా ప్రకటించింది. ఏప్రిల్ 1వ తేదీ నుంచి నెట్‌ఫ్లిక్స్ ఇండియాలో ‘అమిగోస్’ స్ట్రీమింగ్ కానుంది. తెలుగుతో పాటు తమిళం, కన్నడ, మలయాళ భాషల్లో ఈ చిత్రాన్ని స్ట్రీమింగ్ చేయనున్నట్టు నెట్‌ఫ్లిక్స్ వెల్లడించింది. కాబట్టి, థియేటర్లలో ఈ సినిమాను చూడలేకపోయిన ప్రేక్షకులు మరికొద్ది రోజుల్లో ఇంట్లోనే చూసేయొచ్చు.
‘అమిగోస్’ చిత్రం ద్వారా రాజేందర్ రెడ్డి దర్శకుడిగా పరిచయమయ్యారు. అలాగే, కన్నడ బ్యూటీ అషికా రంగనాథ్ ఈ సినిమా ద్వారా టాలీవుడ్‌‌లోకి అడుగుపెట్టారు. మైత్రీ మూవీ మేకర్స్ బ్యానర్‌పై నవీన్ యెర్నేని, వై.రవిశంకర్ ఈ సినిమాను నిర్మించారు. చిత్ర నిర్మాణ సంస్థ అయితే ‘అమిగోస్’ బ్లాక్ బస్టర్ మూవీ అని ప్రకటించింది. కళ్యాణ్ రామ్‌కు తమ సంస్థ ద్వారా ఒక హిట్ ఇవ్వాలనే ఈ సినిమా చేశామని నిర్మాతలు విడుదలకు ముందే చెప్పారు. జూనియర్ ఎన్టీఆర్ సైతం సినిమా చూసి అద్భుతంగా ఉందని చెప్పారన్నారు. దీంతో నందమూరి అభిమానులు ‘అమిగోస్’పై భారీ అంచనాలు పెట్టుకున్నారు.
‘అమిగోస్’ సినిమా విడుదలైన రోజు హిట్ టాక్ వినిపించింది. హీరో, హీరోయిన్, దర్శకుడు, నిర్మాతలు సక్సెస్ సెలబ్రేషన్స్ కూడా చేసుకున్నారు. బ్లాక్ బస్టర్ కొట్టేశామని సంబరాలు జరుపుకున్నారు. కానీ, ఆ తరవాత సినిమా బాక్సాఫీసు వద్ద ఢీలా పడింది. ఈ సినిమా ఫుల్ రన్‌లో ప్రపంచ వ్యాప్తంగా రూ.7 కోట్ల మేర షేర్ వసూలు చేసిందని సమాచారం. నిజానికి ఈ చిత్రం రూ.12 కోట్ల మేర ప్రీ రిలీజ్ బిజినెస్ చేసింది. కానీ, రూ.7 కోట్లే వసూలు కావడంతో నిర్మాతలకు రూ.5 కోట్ల మేర నష్టం వాటిల్లిందని తెలుస్తోంది. మొత్తం మీద బ్లాక్ బస్టర్ టాక్‌తో మొదలై డిజాస్టర్‌గా మిగిలిపోయింది. కళ్యాణ్ రామ్ గత చిత్రం ‘బింబిసార’ బ్లాక్ బస్టర్ కొట్టిన విషయం తెలిసిందే. ఈ సినిమాను కళ్యాణ్ రామే నిర్మించారు.