తాను కొన్ని రోజుల క్రితం గుండెపోటుకు గురయ్యానని, తనకు వైద్యులు యాంజియోప్లాస్టీ కూడా చేశారని సుస్మితా సేన్ గురువారం సోషల్ మీడియా ద్వారా వెల్లడించారు. ఈ పోస్ట్ చూసి ఆమె అభిమానులతో సినీ పరిశ్రమకు చెందిన చాలా మంది షాక్‌కు గురయ్యారు. అయితే, ప్రస్తుతం తాను బాగానే ఉన్నానని సుస్మితా సేన్ తన ఇన్‌స్టాగ్రామ్ పోస్టులో పేర్కొన్నారు. అంతేకాదు, తన తండ్రి తనకు చెప్పిన మాటలను కూడా ఆమె ఈ సందర్భంగా గుర్తుచేసుకున్నారు. తన తండ్రితో కలిసి దిగిన ఫొటోను పోస్ట్ చేశారు.
‘నీ హృదయాన్ని ఎప్పుడూ సంతోషంగా, ధైర్యంగా ఉంచు. అత్యవసర సమయంలో అది నీకు అండగా నిలుస్తుంది (మా నాన్న సుబీర్‌సేన్‌ నాకు చెప్పిన విలువైన మాటలివి). రెండు రోజుల క్రితం నేను గుండెపోటుకు గురయ్యాను. యాంజియోప్లాస్టీ చేశారు. స్టెంట్‌ వేశారు. మరీ ముఖ్యంగా, నాకు చికిత్స చేసిన కార్డియాలజిస్ట్‌ నాది గట్టి గుండె అని ఖరారు చేశారు. సమయానికి స్పందించి నాకు వైద్యం అందించిన అందరికీ ధన్యవాదాలు తెలపాలి. దాని కోసం మరో పోస్ట్ చేస్తా. నా ఆరోగ్యం గురించి నా అభిమానులు, శ్రేయోభిలాషులకు తెలియాలనే ఈ పోస్ట్ పెడుతున్నాను. ప్రస్తుతం నేను ఆరోగ్యంగా ఉన్నాను. కొత్త జీవితాన్ని ప్రారంభించేందుకు సిద్ధంగా ఉన్నాను. ఐ లవ్ యూ’’ అని సుస్మిత ఇన్‌స్టాగ్రామ్ పోస్టులో పేర్కొన్నారు.