Friday, March 31, 2023

Ben Stokes | చెన్నై టీమ్‌కి షాక్ ఇవ్వబోతున్న బెన్‌స్టోక్స్.. ఐపీఎల్ 2023 లాస్ట్ మ్యాచ్‌లకి దూరం?

ఐపీఎల్ 2023 (IPL 2023) ముంగిట చెన్నై సూపర్ కింగ్స్‌కి ఇంగ్లాండ్ స్టార్ ఆల్‌రౌండర్ షాకిచ్చే సూచనలు కనిపిస్తున్నాయి. మార్చి 31 నుంచి భారత్ వేదికగా ఐపీఎల్ 2023 మ్యాచ్‌లు ప్రారంభంకానుండగా.. చెన్నై సూపర్ కింగ్స్ (CSK) టీమ్ టోర్నీ ఫస్ట్ మ్యాచ్‌లోనే డిఫెండింగ్ ఛాంపియన్‌ గుజరాత్ టైటాన్స్‌తో అహ్మదాబాద్ వేదికగా ఢీకొట్టబోతోంది. ఐపీఎల్ 2022లో కనీసం ప్లేఆఫ్స్‌కి కూడా చేరలేకపోయిన చెన్నై టీమ్.. ఈ ఏడాది పట్టుదలతో బరిలోకి దిగబోతోంది. ఈ మేరకు ఐపీఎల్ 2023 ఆటగాళ్ల వేలంలో సీనియర్లతో పాటు కుర్ర హిట్టర్లని కూడా టీమ్‌లోకి తీసుకుంది.

ఐపీఎల్ 2023 వేలంలో రూ.2 కోట్ల కనీస ధరతో వేలంలోకి వచ్చిన బెన్‌స్టోక్స్‌ (Ben Stokes)ని మిగిలిన ఫ్రాంఛైజీలతో పోటీపడి మరీ రూ.16.25 కోట్లకి చెన్నై సూపర్ కింగ్స్ ఫ్రాంఛైజీ కొనుగోలు చేసింది. చేతి వేలి గాయం కారణంగా ఐపీఎల్ 2022 మొత్తానికీ దూరంగా ఉండిపోయిన్ బెన్‌స్టోక్స్ చివరిగా ఐపీఎల్ 2021 సీజన్‌లో రాజస్థాన్ రాయల్స్ తరఫున మ్యాచ్‌లు ఆడాడు. ఆ టోర్నీలో కూడా గాయం కారణంగా టోర్నీ మధ్యలోనే జట్టు నుంచి తప్పుకున్నాడు. అయినప్పటికీ బెన్‌స్టోక్స్ బౌలింగ్, బ్యాటింగ్, ఫీల్డింగ్ సామర్థ్యాన్ని నమ్మిన చెన్నై సూపర్ కింగ్స్ వేలంలో పెద్ద మొత్తాన్ని అతని కోసం వెచ్చించింది.

ఇప్పటి వరకూ 43 ఐపీఎల్ మ్యాచ్‌లాడిన బెన్‌స్టోక్స్ 920 పరుగులు చేశాడు. అలానే 28 వికెట్లు పడగొట్టాడు. ఫీల్డింగ్‌లోనూ బెన్‌స్టోక్స్ మైదానంలో బెస్ట్ ఇస్తుంటాడు. ఓవరాల్‌గా టీ20 కెరీర్‌లో 157 మ్యాచ్‌లాడిన స్టోక్స్ 3008 పరుగులు, 93 వికెట్లు పడగొట్టాడు. దాంతో బెన్‌స్టోక్స్ చేరికతో చెన్నై సూపర్ కింగ్స్ టీమ్ మరింత సమతూకంగా కనిపిస్తోంది. కానీ బెన్‌స్టోక్స్ మాత్రం ఐపీఎల్ 2023 సీజన్ చివరి మ్యాచ్‌లను ఆడలేనంటూ కొత్తగా బాంబ్ పేల్చాడు. దానికి కారణం యాషెస్ సిరీస్ అని ఈ ఆల్‌రౌండర్ చెప్తున్నాడు.

ఐపీఎల్ 2023 షెడ్యూల్‌ని ఇప్పటికే భారత క్రికెట్ నియంత్రణ మండలి (బీసీసీఐ) విడుదల చేసింది. ఈ షెడ్యూల్ ప్రకారం మార్చి 31 నుంచి మే 28 వరకూ మ్యాచ్‌లు జరగనున్నాయి. కానీ.. ఫైనల్ ముగిసిన తర్వాత నాలుగు రోజుల వ్యవధిలోనే లార్డ్స్ వేదికగా ఐర్లాండ్‌తో ఇంగ్లాండ్ టీమ్ టెస్టు మ్యాచ్‌ని ఆడనుంది. ఈ మ్యాచ్‌లో ఆడటం ద్వారా ఇంగ్లాండ్, ఆస్ట్రేలియా మధ్య జూన్ 16 నుంచి ప్రారంభంకానున్న ప్రతిష్ఠాత్మక యాషెస్ టెస్టు సిరీస్‌కి ప్రిపేర్ కావాలని బెన్‌స్టోక్స్ ఆశిస్తున్నాడు. దాంతో ఐపీఎల్ 2023 సీజన్ లాస్ట్ మ్యాచ్‌లకి దూరంగా ఉండాలని యోచిస్తున్నట్లు బెన్‌స్టోక్స్ వెల్లడించాడు. వాస్తవానికి యాషెస్‌ సిరీస్‌లో ఆడే చాలా మంది ఇంగ్లాండ్ ప్లేయర్లు ఐపీఎల్ 2023లో ఆడబోతున్నారు. అందులో జోప్రా ఆర్చర్, మార్క్‌ వుడ్, హారీ బ్రూక్, జానీ బెయిర్‌స్టో, జో రూట్ తదితరులు ఉన్నారు. మరి బెన్‌స్టోక్స్ ప్రతిపాదనకి చెన్నై సూపర్ కింగ్స్ ఒప్పుకుంటుందా? లేదా అనేది చూడాలి.

Read Latest Sports News, Cricket News, Telugu News

Latest news
Related news