గాయాల కారణంగా గత కొంతకాలంగా ఆస్ట్రేలియా జట్టుకి దూరంగా ఉన్న సీనియర్ ప్లేయర్లు గ్లెన్ మాక్స్‌వెల్, మిచెల్ మార్ష్ రీఎంట్రీ ఇవ్వగా.. యంగ్ పేసర్ జై రిచర్డ్‌సన్ కూడా గాయం నుంచి కోలుకుని ఎట్టకేలకి మళ్లీ ఆస్ట్రేలియా జట్టులో చోటు దక్కించుకున్నాడు. మరో 7 నెలల్లో భారత్ వేదికగానే వన్డే ప్రపంచకప్-2023 టోర్నీ జరగనున్న నేపథ్యంలో.. ఈ ముగ్గురూ ఆస్ట్రేలియా జట్టుకి కీలకం అవుతారని చీఫ్ సెలెక్టర్ జార్జ్ బెయిలీ వెల్లడించాడు.
ఆస్ట్రేలియా జట్టు ప్రస్తుతం భారత్ గడ్డపై బోర్డర్- గవాస్కర్ ట్రోఫీలో ఆడుతోంది. నాలుగు టెస్టుల ఈ సిరీస్‌లో ఇప్పటికే రెండు మ్యాచ్‌లు ముగియగా.. రెండింటిలోనూ ఓడిపోయి 0-2తో వెనకబడి ఉంది. ఇక మూడో టెస్టు మ్యాచ్ మార్చి 1 నుంచి ఇండోర్ వేదికగా ప్రారంభంకానుంది. ఈ సిరీస్ మధ్యలోనే మోచేతి గాయంతో ఆస్ట్రేలియాకి వెళ్లిపోయిన సీనియర్ ఓపెనర్ డేవిడ్ వార్నర్.. వన్డే సిరీస్‌కి ఎంపిక చేసిన జట్టులో చోటు దక్కించుకున్నాడు. కానీ.. అతను ఫిట్‌నెస్ నిరూపించుకోవాల్సి ఉంది. అలానే గాయంతో సిరీస్ నుంచి తప్పుకున్న ఫాస్ట్ బౌలర్ జోష్ హేజిల్‌వుడ్ మాత్రం వన్డే జట్టులోకి ఎంపికవలేదు.
ఆస్ట్రేలియా వన్డే జట్టు: పాట్ కమిన్స్ (కెప్టెన్), సీన్ అబాట్, అస్టన్ అగర్, అలెక్స్ క్యారీ, కామెరూన్ గ్రీన్, ట్రావిస్ హెడ్, జోష్ ఇంగ్లిస్, మార్కస్ లబుషేన్, మిచెల్ మార్ష్, గ్లెన్ మ్యాక్స్‌వెల్, జై రిచర్డ్‌సన్, స్టీవ్‌స్మిత్, మిచెల్ స్టార్క్, మార్కస్ స్టాయినిస్, డేవిడ్ వార్నర్, ఆడమ్ జంపా
మార్చి 17న ముంబయిలో తొలి వన్డే మ్యాచ్ జరగనుండగా.. 19న విశాఖపట్నంలో, 22న చెన్నైలో చివరి రెండు వన్డే మ్యాచ్‌లు జరగనున్నాయి. ఆ తర్వాత మార్చి 31 నుంచి ఐపీఎల్ 2023 సీజన్ మ్యాచ్‌లు ప్రారంభంకానున్నాయి.
Read Latest Sports News, Cricket News, Telugu News