మత్స్యాసనం..
మత్స్యాసనం వేయడానికి ముందుగా.. వెల్లకిలా పడుకోవాలి. రెండు అరచేతులూ చెవుల పక్కన ఆనించి తలనీ, భుజాల్నీ నేల నుంచి కొంచెం పైకి లేపి తల పై భాగాన్ని మాత్రమే కింద ఆనించాలి. చేతులను తొడల మీద పెట్టుకోవాలి. అలా కాళ్ల మీద పెట్టడం కష్టమనిపిస్తే రెండు చేతులనూ కింద ఆనించి ఉంచవచ్చు. ఈ భంగిమలో ఎంతసేపు ఉండగలరో అంత సేపు ఉండి, చేతులను తీసి మళ్లీ భుజాలకూ చెవులకూ మధ్యన ఉంచాలి. మెల్లగా తలను యథాస్థితికి తీసుకురావాలి. ఇలా మూడుసార్లు చేయాలి.
పద్మాసనం..
మొదట రెండు కాళ్లు.. చాపి నేలపై ఉంచాలి. తరువాత ఎడమ కాలును కుడి తొడపై, కుడి కాలును ఎడమ తొడపై ఉంచాలి. రెండు చేతులను మోకాళ్లపై నిటారుగా ఉంచాలి. చూపుడు వేలును బొటన వేలుకి నడుమ ఆనించి మిగతా మూడు వేళ్లను ముందుకు చాపి ఉంచి చిన్ముద్ర ధ్యాన స్థితికి చేరుకోవాలి. ఆ ఆసనం వేస్తున్న సమయంలో భ్రూమధ్య దృష్టిగాని, నాసాగ్ర దృష్టి గాని ఉండాలి. ధ్యానంలో ఉన్నప్పుడు హృదయస్థానంలో మనస్సును ఏకాగ్రం చేస్తే మంచి రిజల్ట్స్‌ వస్తాయి.
బాలాసనం..
బాలాసనం ప్రాక్టిస్‌ చేస్తే.. మైగ్రేన్‌ నొప్పి నుంచి ఉపశమనం లభిస్తుంది. బాలాసనం వేయడానికి ముందుగా.. బోర్లా పడుకుని కుడి మోకాలు, కుడి చేతిని పక్కకు మడిచిపెట్టాలి. ఎడమ కాలు, ఎడమ చేయి కిందికి తిన్నగా ఉంచేసి సేద పడుకోవాలి. నడుము నొప్పి ఎక్కువగా ఉన్నప్పుడు.. వెంటనే రెండు నిమిషాలు కుడివైపు, రెండు నిమిషాలు ఎడమవైపు ఈ పోజ్‌లో పడుకోండి.
శవాసనం..
మ్యాట్‌పై కాళ్లు, చేతులు చాపి వెల్లకిలా పడుకోవాలి. శరీరాన్ని పూర్తి విశ్రాంత స్థితిలో ఉంచాలి. శ్వాస మీద దృష్టి పెట్టాలి. ఎలాంటి ఆలోచనలనూ మనసులోకి రానీయకుండా ఓ రెండు మూడు నిమిషాలు ఈ స్థితిలో ఉండండి. శవాసనం వేస్తే.. ప్రశాంతంగా నిద్రపడుతుంది. నిద్రలేమి కారణంగానూ.. మైగ్రెన్‌ సమస్య ట్రిగ్గర్‌ అయ్యే అవకాశం ఉంది.
మార్జారాసనం..
మార్జాలం అంటే పిల్లి. ఈ ఆసనం వేయడానికి రెండు చేతులను గడ్డం కింద ఉంచుకుని బోర్లాపడుకుని విశ్రాంతి స్థితిలో ఉండాలి. రెండు అరచేతులను నేల మీద ఉంచి మోకాళ్ల మీద లేవాలి. ఈ స్థితిలో చేతులు నిటారుగా ఉండాలి. ఇప్పుడు శ్వాస తీసుకుంటూ వీపును కిందకు వంచి తలను పెకైత్తాలి. తర్వాత శ్వాస వదులుతూ వీపును పైకి లేపుతూ తలను కిందికి వంచి నాభిని చూడాలి. ఇలా రోజూ పదిసార్లు చేసిన తర్వాత బోర్లా పడుకుని విశ్రాంతి తీసుకోవాలి.
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.