ఐపీఎల్ ఆరంభం విషయంలో ఎలాంటి ఇబ్బందులు లేకున్నప్పటికీ.. ముగింపు తేదీ బీసీసీఐకి తలనొప్పిగా మారే అవకాశం ఉంది. మే 28 లేదా జూన్ 4వ తేదీన ఐపీఎల్ ఫైనల్ జరపాలని బీసీసీఐ భావిస్తోంది. కాగా వరల్డ్ టెస్ట్ ఛాంపియన్‌షిప్ ఫైనల్‌ను జూన్ తొలి వారంలో నిర్వహించే అవకాశం ఉంది.
ఒకవేళ భారత జట్టు వరల్డ్ టెస్ట్ ఛాంపియన్‌షిప్ (WTC 2023) ఫైనల్‌కు అర్హత సాధిస్తే.. బీసీసీఐ ఐపీఎల్ షెడ్యూల్‌ను సవరించాల్సి వస్తుంది. లండన్‌లోని ది ఓవల్ స్టేడియంలో జూన్ 7-11 తేదీల మధ్య టెస్ట్ ఛాంపియన్‌షిప్ ఫైనల్ ప్రారంభమయ్యే అవకాశం ఉంది.
టీమిండియా WTC 2023 ర్యాంకింగ్స్‌లో ప్రస్తుతం నాలుగో స్థానంలో ఉంది. ఈ నెలలోనే బంగ్లాదేశ్తో రెండు టెస్టులు ఆడనున్న భారత్.. వచ్చే ఏడాది సొంత గడ్డ మీద ఆస్ట్రేలియాతో నాలుగు టెస్టుల సిరీస్ ఆడనుంది. దీంతో టీమిండియా ఫైనల్ చేరే అవకాశాలు ఉన్నాయి. భారత్, ఆస్ట్రేలియా మధ్య వన్డే సిరీస్.. ఐపీఎల్ ప్రారంభమయ్యే ఏప్రిల్ 1వ తేదీకి కొద్ది రోజుల ముందే ముగియనుంది.
ఆస్ట్రేలియా జట్టు భారత గడ్డ మీద 4 టెస్టులు, మూడు వన్డేల సిరీస్ ఆడనుంది. ఇరు జట్ల మధ్య చివరి వన్డే మార్చి 22న జరిగే అవకాశం ఉంది. బంగ్లాదేశ్తో టెస్ట్ సిరీస్‌ను క్లీన్ స్వీప్ చేయడంతోపాటు.. ఆసీస్‌పై టెస్టు సిరీస్‌లో భారత్ 4-0 లేదా 3-0 తేడాతో గెలిస్తే టీమిండియా వరల్డ్ టెస్ట్ ఛాంపియన్‌షిప్ ఫైనల్ చేరుకుంటుంది.
గత ఐపీఎల్ సీజన్లో మాదిరిగానే వచ్చే సీజన్లోనూ పది ఫ్రాంచైజీలు బరిలోకి దిగనున్నాయి. మొత్తం 991 మంది ఆటగాళ్లు వేలానికి తమ పేర్లు రిజిస్టర్ చేయించుకున్నారు. వీరిలోల 714 మంది భారత క్రికెటర్లు కాగా.. 277 మంది విదేశాలకు చెందిన ఆటగాళ్లు. 19 మంది క్యాప్డ్ ఇండియన్ ప్లేయర్స్, 166 మంది క్యాప్డ్ ఇంటర్నేషనల్ ప్లేయర్స్ వేలంలో పాల్గొననున్నారు.
Read More Sports News And Telugu News